هننطللق بأيه؟

بسم الله الرحمن الرحيم

نكمل كلامنا و نقول هننطلق بأيه ؟ هو أيه يعنى اللى هيصلح الفساد الكتير دا ؟ عصا سحرية و لا الفانوس السحرى ؟! انتهى عصر المعجزات و العالم كله بيتصرف بالعلم و التكنولوجيا . بس قبل العلم و قبل التكنولوجيا كان فيه أيه و التقدم دا حصل ليه ؟ هى فكرة عملية مش أكتر . ناس فكرت فحاربت من أجل فكرتها لحد ما أصبحت حقيقة و أصبحت شكل و فعل . يعنى برده فين الحل ؟ اصل لازم أقول كدا و لازم أقول ان انتصارنا فى معركة حطين كانت فكرة . ناس عاشت لفكرة و ءامنت اننا نقدر نهزم العدو . الفكرة مش بتاعت صلاح الدين . الفكرة كانت قبله بكتير و كملها صلاح الدين و أراد ربنا يكون النصر الفعلى على أيده لكن الفكرة كانت قديمة قوى من أول ما نور الدين فكر و قال النصر لازم يبقى بالوحدة و عاش بالفكرة دى . لازم أقول المقدمة دى عشان أى فكرة مش هتكون نتيجتها من يوم و ليلة بس هى فكرة و لازم نعيش من أجلها . فى أفكار على المستوى الشخصى و فى على المستوى العام و العالمى كمان . عايز ننطلق بأفكارنا بس مش مجرد كلام . احنا عايزنها تبقى فكرة عملية . خلونا نسمى مشروعنا دا " فكرة نافذة منفذة " . فى فكرة نافذة الى العقل تحرك الجوارح فتصبح منفذة . كل مرة هنمسك موضوع فى حياتنا و هنتناقش فيه و نطلع كل أفكارنا حتى الابداعية منها و اللى ممكن تنفذ بعد كدا . بس أهم حاجه اننا مننساش الفكرة و نعيش عشانها . و عشان يكون للفكرة دى ثواب فى الدنيا و الاخرة خلونا نحط نية ليها و نقول انها عشان اصلاح فرد , مجتمع , بلد , أمة و عالم . طيب و احنا هنصلح ليه ؟ و أحنا مالنا ؟ . أصلى شفت عصفورة رائعة طايره فى السماء . تمنيت انى أكون زيها و أطير بلا حدود و بدون ما حد يمنعنى أدخل غزة أو حد يمنعنى انى اطير فى العشوائيات بدون حرج أو .... و أو .... بس للأسف العصفورة عصفورة . بتتنقل آه و بتعبد ربنا و بتسبحه كمان بس ايه أمكانيتها و معانيها فى الحياة : بطير زى باقى العصافير بدون حدود بس بدون معنى . لكن أحنا شىء مختلف . أنسانيتنا تختلف عن باقى الطيور و الحيوانات . لما أروح لغزة أنا عارفه بروح ليه ، لما بزور طفل يتيم أو مريض أنا مدركه بزوره ليه . عشان كدا ساعتها غيرت أمنيتى أن أكون عصفورة لانى هفقد معنى الحياة . دى كانت مقدمة عن هننطلق بأيه و المرة القادمة أن شاء الله هنبدأ ب " فكرة نافذة منفذه " . فنسأل الله أن يرزقنا الأخلاص و التوفيق و الثبات فى موضوعاتنا و أن تكون سببا فى أصلاح هذه الأمة .